« Mai de 10 ans de creacion de contengut audiovisau en occitan »
Camille Jourde es assistenta de produccion e presentatritz per la cadena de television sus internet ÒCtele. Creada en 2013, ÒCtele prepausa de contengut en lenga occitana, per totas las edats, accessibla gratuitament.
Una television que prepausa de programas 100% en occitan, aquò existís ? En efièch, existissèm dempuèi 2013 ! Aquò fa mai de 10 ans que cream de contengut en occitan, dins diferents dialèctes e de diferentas formas. Produsèm de reportatges, de documentaris e de capsulas adaptadas per las rets socialas. Sostenèm coma difusor e coproductor d’òbras de ficcion e d'animacion. Tot aquò nos permet d'aver una programacion totes los sers accessible sus nòstre sit e de nombrosas videos a la demanda sus las diferentas plataformas.
I a de programas que permeton d'aprene la lenga ? Afars Occitans amb lo YouTubeur Parpalhon Blau, es un format perfièch per aprene la lenga ! Mi francés mi occitan, aquel programa es adaptat a totes los publics. De faiçon generala, nòstres contenguts son sostitolats en francés e en occitan, çò que permet de progressar aisidament.
Qual es lo ligam entre OCTele e Tolosa ? La mitat de nòstra equipa es basada a Tolosa ! I avèm realizat qualques reportatges polits e es una vila que nos inspira fòrça, pels nombroses projèctes que nisa. Sèm recentament partits a la descobèrta de tolosans dins l'encastre del format Passaires de lenga, que pareisserà lèu sus nòstras rets socialas. Gardatz los uèlhs dobèrts !
Una emission a recomandar en particular ? Lo 19 de març 2025 soi montada a París per una serada excepcionala : Lo concèrt de Nadau al Grand REX. Èra un espectacle magnific, lo concèrt èra sublim, lo public en deliri, la fanfara d'acuèlh los avián plan rescaufats. Vos convidi a anar veire aquel Eveniment per ausir Joan parlar de sa carrièra sus la magnifica scèna del Grand REX… Una entrevista unica.
Octele se visiona sul site internet www.octele.com, amb un dirècte cada jorn de 18h30 a 22h30, e es presenta sus las rets socialas.
Lexic :
- Aisidament : facilement
- Ausir : entendre
- Cadena : chaîne
- Contengut : contenu
- Edat : âge
- Ligam : lien
- Nisar : nicher
- Rets socialas : réseaux sociaux
- Rescaufar : réchauffer
- Sostitolats : sous-titrés
Pour accéder à la version française, flashez ce QR Code