« Un musician es una esponga »
Jérémy Couraut, cantaire, musician, autor, es un niçard que bolega Tolosa amb d’instruments improbables en cogordons, coma son espina emblematica.
Lexic :
- Ausir
- entendre
- Avisat
- avisé, aperçu
- Barris
- quartiers
- Cogordon
- calebasse
- Crescut
- grandi
- Despegat
- décollé
- Eissut
- issu
- Laütier
- luthier
- Sorgas
- sources
- Tornamai
- à nouveau
Quina es l’importància d’aquel instrument, l’espina, dins vòstre percors ?
Lo grop Djé Balèti es nascut de la descobèrta de l’espina, fa un pauc mai 15 ans. Es un instrument niçard ancian, qu’aviá desaparegut, una mena de guitarra de quatre còrdas facha dins un cogordon. Amb aquel instrument, qu’es en plen occitan, me soi despegat dels Estats-Units, de la musica anglo-saxona, aquela amb la quala ai primièr crescut. L’autra influéncia granda pel projècte Djé Balèti, es la pensada de Castan que trobèri alara qu’èri en cèrca d’identitat : de qu’es d’èsser occitan ? Soi eissut d’una familha multiculturala, de Cuba, Sicília, Tunisia, Venezuela e fin finala Niça ; aviái fach de musica amb de Brazilians, d’Egipcians etc. Mas, me soi avisat que çò que coneissi melhor es Niça, l’Occitania. M’a pres 40 ans per trobar çò que vòli dire.
Sètz de Niça, mas quina es la part tolosana de Djé Balèti ?
Ja, es aquí qu’ai poscut viure tot aquò. E lo projècte se plaça dins la seguida de la Linha Imaginòt, de la granda revolucion dels barris del mond : son de moviments occitans que lor sorgas son Tolosa e Montalban. Ai poscut faire meuna aquela pensada revolucionària. E puèi, sèm noirits de totas las culturas presentas a Tolosa : musicas del Mexic, del Brazil, lo chaâbi del Maghreb, la musica de la Reunion. Un musician es una esponga. Ara, ne sèm a 4 disques de Djé Balèti e preparam ja lo cinquen.
E vos contentatz pas de l’espina, fasètz d’autres instruments en cogordons ?
Dins los libres ne vesiam d’autres, amb Jérôme Désigaud lo laütièr, e voliam ausir aqueles instruments tant fòls. Alara los avèm fargats : de petadors, de trompas e percussions. Fa 15 ans ara, avèm fondat la Vespa Cogordon Ourchestra que jogarà ongan en Anglatèrra, en Alemanha o en Italia. E la Vespa es tanben fòrça ligada al carnaval que creèri dins mon barri de Tolosa, lo carnaval de la Veirariá. Es tornamai l’influéncia de Niça e de son carnaval independent.
Pour accéder à la version française, flashez ce QR Code
