« Se passa quicòm a tolosa per l'occitan »

Fa un an que Laurença Augery baileja la librariá 100 % occitana de Tolosa, la Tuta d'Òc, una botiga que benefícia d'un vam novèl.

Lexic :

  • Aisit : aisé, facile
  • Aparar : protéger
  • Auça : hausse
  • Baileja : diriger, administrer
  • Cabussat : plongé
  • Creis : croissance
  • Ongan : cette année
  • Quicòm : quelque chose
  • Ret sociala : réseau social
  • Tuta : tanière
  • Vam : élan

La Tuta d'Òc coneis d'aquesta passa un creis de frequentacion ?

A la fin d'agost, aviam una avança de la chifra d'afar de 5 000 euros en rapòrt al meteis mes l'an passat. Me pensi qu'es en ligam tanben amb l'auça dels aprenents als corses d'occitan de l'IEO 31, que reçaup ongan 30 % d'inscriches en mai. Se passa quicòm a Tolosa, me sembla, amb lo moviment Carrièras Occitanas que nos ajuda plan. La Tuta podriá grandir, qu'es pichona. Ensagi de desvolopar mai lo canton musica amb los vinils o tanben los vestits amb la marca Boudu.

Ne sètz part d'aquelas arribadas dins la cultura occitana ?

Es en 2022 que comencèri a prene de corses amb l'IEO 31, justament. Soi d'Arieja a la basa e quora, en dos jorns, moriguèron mon grand e mon grand-oncle, me soi dich que me caliá aprene l'occitan, aparar aquela lenga qu'es la de ma familha. Me semblava natural e un còp qu'ai mes lo pè dedins, ai cabussat. Aimi pas far las causas a mitat. En 2025, comencèri d'èsser benevòla a l'IEO 31, notadament a la Tuta d'Òc, e en 2026 quitèri mon trabalh per prene lo pòst de librària.

E aviatz ja una coneissença de la literatura occitana ?

Aviái un pauc idèia de çò que se fasiá mercés a l'IEO 31, que sos corses tractan a l'encòp de lenga e de cultura. Sustot, dempuèi 2022 legissi pas qu'en occitan, o benlèu un libre en francés dins l'annada ; per progressar çò mai aisit es de legir. Mas ai totjorn fòrça legit, tre pichona. Ai pas léser de veire tot çò qu'existís en occitan, pasmens descobrissi las novetats e los ancians : comencèri Delpastre fa gaire, de novèlas de Leon Còrdas e coma avèm reçauput au mes d'octòbre Fabienne Vayrette-Péchali, legiguèri abans son libre emai lo precedent per preparar l'encontre.

Venir librària èra causir un mestièr amb mai de sens per vos ?

Es una activitat que vesiái pas coma un trabalh, mas coma un plaser. Aquò's encara lo cas, mas es pas parièr de téner un comèrci e de legir. Abans, èri responsabla administrativa e juridica per una ret sociala de lectura, çò que m'ajuda bravament per la gestion de la botiga. De tota mena, la Tuta d'Òc es pas un trabalh classic, es de militantisme.

Pour accéder à la version française, flashez ce QR Code ou accédez à ce lien https://metropole.toulouse.fr/kiosque?Key=A%20Toulouse