« En òc, soi mai atentiva al ritme de la lenga »
Fa 12 ans, Karine Berny sabiá res de l’occitan. Uèi, presenta sa segonda formacion en òc : P.A.T.O.I.S.
Cossí sètz arribada a cantar dins La Mal Coiffée e ara dins P.A.T.O.I.S. ? Èri dins una companhiá de circ que s’installèt dins Menerbés. Arrestèri lo circ quand aguèri mon segond enfant, La Mal Coiffée cercava una cantaira e vaquí. Lo grop m’aviá vista al circ ont cantavi e jogavi de trompeta. Ieu, soi nascuda a París e coneissiái pas brica la cultura occitana, emai se fasiá de temps qu’èri dins lo sud, del costat de Gap e Marselha. Èra genial per ieu de descobrir la lenga del Menerbés al moment que m’i installavi. E puèi, lo trabalh de las percussions amb las votzes que fasèm dins lo grop m’agradèt fòrça. P.A.T.O.I.S. es un projècte nascut d’una enveja amb Laëtitia Dutech, que canta ela tanben dins La Mal Coiffée. Voliam montar un duò, compausar e escriure.
Ara, P.A.T.O.I.S. es un triò. De que foguèt vòstra evolucion per integrar un membre de mai ? Lo duò es una fòrma exigenta e èra passionant d’o far tot amb Laëtitia : causiguèrem de poèmas, caduna escriviá de melodias, fasiam los adobaments amassa. E puèi caduna portèt de cançons tanben. Per ieu èra l’escasença d’experimentar l’escritura en occitan. Me soi avisada qu’en òc soi mai atentiva al ritme de la lenga qu’al sens, pensi mai a jogar amb los mots. Pensi que ven de mon aprentissatge amb La Mal Coiffée e tot lo trabalh ritmic. Mas per P.A.T.O.I.S. nos avisèrem qu’aviam de besonh d’un autre timbre, per pas semblar a La Mal Coiffée. Avèm rescontrat Arthur Daygue pendent una seria de concèrts a la Cava Poesia e l’avèm integrat.
De que càmbia la preséncia d’una tresena persona ? Arthur nos dobrís completament l’univèrs : el ven del jazz e de la musica improvizada. Jòga de clarineta bassa e de guitarra electrica e sulpic es vengut colorar las cançons. Ara, tornam trabalhar l’estructura dels tròces. Cantam amb de percussions totjorn, mas el nos pòrta una dimension electrica, plan rock, que manda de son ! Avèm fait una residéncia a Rodés totis tres per èsser prèstes a far virar lo concèrt pendent l’estiu.
Duò P.A.T.O.I.S. en concèrt le 29/07 a 17h e 19h, barri d’Empalòt. « Les Instantanés » - toulouse.fr>cultures
Version française sur toulouse.fr
Lexic :
Adobaments : arrangements
Ara : maintenant
Avisada : avisée, aperçue
Enveja : envie
Escasença : occasion
Emai : même
Jogar : jouer
Manda : envoie
Nascuda : née
Pas brica : pas du tout
Plan rock : très rock
Sulpic : tout de suite
Tròces : morceaux
Votz, votzes : voix