« Aicí tot lo mond defend l'òc »
Carrièra del Taur, la botiga Macarèl, dubèrta en 2013 per Danís Cantornet, prepausa vestits e productes en òc.
Macarel nasquèt a Montpelhièr, perqué avètz volgut vos installar a Tolosa fa 7 ans ?
Fasiá longtemps que voliái venir, mas avèm esperat de trobar un bon local. D'autres an pas capitat de s'implantar, nos caliá una bona visibilitat e nos adaptar a la vila : avèm fòrça productes a la violeta pels toristas, que la mercandisa « occitana » basta pas. Mas voliam venir aicí perqu'es un centre fòrça atractiu. I a mond que venon far de crompas de tota la region, d'Erau fins al Bearn ; d'autres que venon de Bordèu o de Dordonha perqué los enfants son estudiants a Tolosa. E puèi aicí emai los borgeses defendon la cultura occitana e crompan çò que pòrta la crotz.
Aquela implantacion es una capitada ?
Solide, es una capitada. Fa qualques annadas que las vendas baissan dins las fièras, que lo mond crompan mai sus Internet o dins las grandas susfàcias. La botiga carrièra del Taur nos permetèt de compensar aquesta baissa, emai d'aumentar la chifra d'afar.
Quinas son las consequéncias de la crisi sanitària per Macarel ?
3 emplegats en mens e la chifra d'afar que demesiguèt de mai de 60%. Èra una annada rufa, segur, e sabèm que 2021 o serà tanben. Avèm passat los confinhaments amb un bocin d'ajuda, mas lo cobrifuòc es gaireben pièger : dubrissèm la botiga mas degun ven pas, pagam un emplegat e dintram pas que 50 èuros dins la jornada. Urosament que la venda en linha marcha plan. En 2020, los productes occitans nos an fait 70% de las vendas. Sens los toristas, son lo mond del país que crompan.
L'entrepresa es en perilh amb totas aquelas baissas ?
Avèm pro d'estalvi per pagar las comandas de l'an e los salaris, mas pas pro per aver de novèls productes. Farem 3 o 4 camisetas en mai. Mas avèm pas jamai fait Macarel per l'argent, la tòca primièra es de socializar la lenga. Quand comencèrem pensàvem pas d'arribar a tot çò aquò. Qué que siá, contunharem.
Version française sur toulouse.fr
LEXIC :
Bocin : un peu
Camisetas : t-shirts
Cobrifuòc : couvre-feu
Crompas : courses
Crotz : croix
Emai : même
Estalvi : épargne
Fièras : foires
Pièger : pire
Pro : assez
« Qué que siá » : quoi qu'il en soit
Solide : bien sûr