« Promòure l’art plastic occitan e los artistas »
Lo mes passat, se lancèt la primièra galariá virtuala d’art occitan, presentacion amb Cathy Lacroix.
Lexic :
- Coneguts : connus
- Crompar : acheter
- Escalpraduras : sculptures
- Esperit : esprit
- Estrès : stress
- Fasa : phase
- Ligan : lient (ligar = lier)
- Òbras : oeuvres
- Quadre : tableau
- Solid : bien sûr
Una galariá, virtuala coma fisica, es primièr consacrada als arts plastics ?
Òc, lo projècte es nascut de la volontat de faire mai de plaça a l’art plastic occitan. D'en primièr dins las paginas del magazine Lo Diari (publicat per l’IEO de la region) gràcias al trabalh del collectiu Praxis Escrita Liura. Puèi ara amb aquela galariá virtuala, pensada amb lo plastician Joan-Carles Codèrc que n’es lo director artistic. Per començar avèm d’escalpraduras e de quadres, realizats per Gerard Marty, Bernard Cauhape, Robin Chouleur o solid Joan-Carles Codèrc. Prenèm d’artistas que ligan lor practica artistica a la lenga d’òc, siá perque son dins un esperit local, siá perque utilizan de mots dins lors òbras. A travèrs d'aquò, pensam promòure l’occitan.
Es previst d’aver una rotacion importanta d’òbras ?
Una galariá d’art virtuala fonciona amb d’artistas convidats e amb d’artistas presents dins un temps long. Es un modèl qu’existís ja dins lo mond de l’art internacional, inventam pas res. Mas avèm ja de sollicitacions d'en pertot, fòrça mond crean amb la lenga d’òc emai de mond coneguts. Esperam doncas que lo projècte se desvolope. Es encara la fasa de tèst, fa dos ans que trabalham sus l’aventura, anam veire sei a de visitas sul sit.
Es doncas possible de crompar dins aquela galariá ?
Òc, solid. Volèm promòure l’art mas tanben los artistas, qu’an de mal de se far valer individualament. Es lo principi d’un collectiu : amassa sèm mai fòrts, sèm mai organizats. Fin finala, es l’idèa de basa de l’IEO. Per ara, sèm contents d’aver passat l'estrès de l’inauguracion del sit, galaria.lodiari.com, e lo vernissatge de l’exposicion. Discutissèm amb d’artistas e contunham d’avançar dins aquel terren que nos èra inconegut.
Version française sur toulouse.fr