« Cantar, es un biais de s'encontrar que cadun pòt far »
Chanteuse et professeure de chant, Anne Enjalbert constate la popularité de plus en plus grande du chant traditionnel.
Lexic :
- Atal : ainsi
- Banhèri : j'ai baigné
- Biais : manière, façon
- Cantèra : moment de chant spontané et collectif
- Ensem : ensemble
- Licèu : lycée
- Ligada : liée
- Pauc a cha pauc : petit à petit
- Pòrtavotz : porte-voix
- Talhièrs : ateliers
- Tièras : listes
Dins vòstre percors, la practica del cant es ligada a la lenga occitana ? Forçadament, canti en occitan perque soi ligada a la lenga. Tre pichona banhèri dins la cultura occitana : dins ma familha se parlava, se cantava, se dansava. Mas èra sens conéisser çò qu'es l'occitan, es al licèu qu'ai comprés l'ample de l'airal cultural en defòra de Roergue. Quand arribèri a Tolosa, me semblava que lo cant èra un biais natural de viure sa cultura dins la ciutat. E ai començat a seguir de talhièrs, dins las annadas 2000. Mas èra diferent d'ara, qu'a l'epòca i venián sustot de mond del mitan occitanista.
I a mai de public ara pels corses de cant en occitan ? Francament, òc. Fau un cors al COMDT, pels adultes amators, i a dos grops de 23 personas e cada an son mai nombroses, fasèm de tièras d'espèra. Lo public es mai jove qu'abans amb de mond que venon d'arribar dins lo país : aquò a de sens per eles de descobrir atal la cultura d'aquí. Son curioses. Se pòt començar sens aver jamai cantat abans e aprene pauc a cha pauc. Pensi tanben que lo mond an besonh de se religar, çò que manca dins nòstra societat e que lo cant permet.
Lo cant a una fonccion sociala ? Es un biais de s'encontrar diferent, que cadun o pòt far e que pòrta de jòia al mond. Es un art de l'instant que fasèm amb los autres. En cantèra solid, mas quitament un solista es qualqu'un que pòt far cantar o far escotar son biais de cantar, que se far pòrtavotz d'un collectiu. Es important doncas de transmetre lo cant perqu'a fòrça sens. Ma practica artistica es dins de grops, a 3 o 4 votzes. Mai que mai amb lo trio Albada, mas tanben amb un ensem de polifonia sacrada o de cants rituals, que se sona Estelum. Abans, las cançons ritualas de sason o de maridatge, de carnaval avián la fonccion de religar lo mond dins un eveniment. Ara, la fonccion s'es desplaçada per religar los qu'escotan e los que cantan.
Pour accéder à la version française, flashez ce QR Code