« L'occitan es totjorn una luta »

Teatre, vida associativa e ligam social : rencontre amb una animatritz culturala, Maria-Elena Weber.

Cossí nasquèt lo Teatre del Platanièr ? Creèrem la tropa en 2013, a l'iniciativa del Joan-Marc Leclerc. Lo rejonhèri sulpic que fau de teatre dempuèi totjorn, emai en occitan. Sèm mantun present dempuèi la debuta, mas i a mond tanben que venon pas que per un espectacle. Lo Platanièr es una tropa d'amators, mas que fan las causas seriosament : jogam una pèça cada an e prenèm lo temps de trabalhar amb fòrça repeticions. A la debuta montavem de pèças del repertòri occitan e ara escrivèm los nòstres espectacles. Esperam de poder presentar ongan lo de 2020. Es lo Joan-Marc que l'escriguèt, se ditz « Cha-cha-cha » e parla de l'encontre entre generacions.

Lo Teatre del Platanièr es ancorat, coma vos, dins lo barri de las Pradetas ? La tropa es basada a Tornafuèlha, mas es verai qu'a las Pradetas avèm trobat d'ajuda, de salas de repeticions. Participèrem al festenal de teatre que s'i creèt en 2018 – la segonda edicion foguèt anullada en 2020. Es mon barri, es fòrça agradiu perqué lo Collectiu de las Pradetas balha de vam. Avèm ja obtengut de la Comuna d'òrts partejats, mas lo projècte gròs es de montar una bòrda collectiva e biologica. Al cafè cultural « Folles Saisons » se programan de conferéncias, cada mes de concerts se tenon al mercat. E avèm la « Gazette des Pradettes » qu’es mandada als estatjants per corric.

E la cultura occitana a sa plaça dins aquelas activitats ? Aver una plaça per l'occitan es totjorn una luta. Mas faguèri venir d'intervenents a las Folles Saisons, coma Mans de Breish, Rémy Pech, Eric Fraj o encara Alem Surre Garcia. Longtemps avèm agut un grop de discutida en òc, los Pradelons. A la bibliotèca del barri se pòdon consultar de libres en occitan. Çò que me fa plaser es de veire que de joves arrivan aicí : lo collègi Calandreta s'es installat a las Pradetas e puèi una cantaira, Matilda Lalle, anima un talhièr de cants polifonics pireneencs.

Version française sur toulouse.fr

LEXIC :

  • Bocin : un peu
  • Ajuda : aide
  • Ancorat : ancré
  • Barri : quartier
  • Bòrda : ferme
  • Corric : courriel
  • Ligam : lien
  • Luta : lutte
  • Òrt : jardin potager
  • Pèça : pièce
  • Platanièr : platane
  • Vam : élan, dynamisme