I a pas de dinstincion entre musica saberuda e tradicionala
Depuis 1989, le festival Déodat de Séverac, dirigé par Jean-Jacques Cubaynes, conjugue musique classique et culture occitane.
LEXIC :
Ensag : essai
Ieu : moi
Pivelat : fasciné
Quite : lui-même
Reviradas : traductions
S'enganava : se trompait
Saberuda : savante
Sonque : uniquement
Mesclar musica en òc e musica classica, aquò's aisit ?
Tot ven del quite Déodat de Séverac. A pas jamai volgut far de distincion entre la musica saberuda, aquela qu'el practicava, e la musica tradicionala. Per el, i a un tot : la musica. Era nascut en 1872 a Sant Felitz de Lauragués, ont tot lo mond parlava en occitan e ont ausiguèt las cançons tradicionalas dels paisans. E Déodat de Séverac disiá que son « ieu prigond » èra noirit per tot lo particularisme d'aquela region, qu'auriá pas poscut far la metèissa musica qu'un òme del nòrd. Criticava lo centralisme, n'a quitament fach un ensag en 1907 : « Le centralisme et les petites chapelles musicales ». Alara, pel festenal volèm far ausir la musica de Déodat de Séverac e sustot sas idèias.
Era tanben un artista pivelat per mediterranèa ?
Era un anticonformista. Se definissiá coma « musician paisan » e voliá far la musica qu'aimava emai se s'enganava. Integrava dins sas òbras las lengas « vernacularas », d'instruments tradicionals de la cobla catalana. Enfin, desirava crear una escòla mediterraneana de musica qu'aniriá de Catalonha fins a Italia. Mas moriguèt abans d'o poder far en 1921.
Cossí alara se tradusís tot aquò dins la programacion ?
Ja, cada an, fasèm un estagi de polifonia occitana. E cada an tanben, fasèm de creacions. Volèm mostrar que la cultura d'òc es viva, qu'anam pas sonque quèrre Mistral o d'autres, emai s'o fasèm tanben : aviam creat Mireio amb lo Courou de Berra. Ongan, es un espectacle que se ditz « Triangle amoureux et trobar » : la tematica n'es lo combat de l'amor pels Trobadors amb, en miralh, d'òbras de Monteverdi. Totjorn suls Trobadors, un pianista american, Barton Bullock, que compausèt de cicles amb de reviradas en anglés. L'idèia del festenal es que se rescontren d'artistas de diferentas practicas musicalas : lo trad e lo classic, lo classic e lo jazz etc. Es çò qu'aimava Séverac.
