« Los còdis culturals son a còps tròp vists »
Elodia Saulnier es grafista per la revista Lo Diari que fa referéncia per la cultura d'òc.
LEXIC :
A còps : parfois
Berric : Berry
Còla : équipe
Gerissi : je gère
Ensajar : essayer
Estampar : imprimer
Levat : sauf
Ligam : lien
Pagina : page
Polit : joli
Fasètz de grafisme per illustrar la cultura d'òc : quin es vòstre ligam amb aquela lenga ? Arribèri a l'Institut d’Estudis Occitanas (IEO) e doncas al Diari fa 5 ans, per asard. Coneissiái pas la lenga occitana, levat qu'es la lenga de Tolosa. Soi del Berric, al mieu la lenga es lo Peitavin- Santongés. Faguèri mos estudis en grafisme a Tolosa, amb una especializacion dins l'edicion : libres, magazines, comunicacion visuala, afichas, logos… tot çò que se dèu estampar. Pasmens, me calguèt doncas descobrir la cultura d'òc e sos còdis, coma la crotz jaune sus fons roge. Me los caliá conéisser tanben per me'n escartar, me'n destacar sens perdre lo messatge. Son benlèu tròp vists a còps.
Avètz participat a la carta grafica del Diari ? Lo Diari existissiá abans mon arribada, ai trabalhat sus la maqueta per li balhar l'imatge d'un vertadièr magazine ; per ensajar de tocar de mond exteriors a l'occitan e per aquò, cal de polits visuals. Coma per un libre, es la cobèrta, la una, que balha enveja de legir çò que i a al dintre. Avèm fach evoluir la maqueta pauc a pauc, amb un cambiament de tipografia, l'imatge que prend tota la cobèrta ara o lo dossièr interior mai marcat. Me soi regalada pel numèro consacrat a la BD, dessenhèri tot e aquí nasquèt tanben la mascòta del Diari, Danièl Lapatana.
Sètz en carga de l'illustracion de tot lo magazine ? Ai un bon mes de trabalh per cada Diari – que se publica cada dos meses. Mas es un trabalh tanben collectiu, perque per cada numèro se decidís d'una tematica e partejam las idèas qu'avèm. A partir d'aquelas idèas comenci d'obrar per la cobèrta, cèrqui d'iconografias, a còps dessenhi, fau de pinturas. Soi pro liura e abans tota causa me fau plaser. Mas çò que fau es totjorn validat per tota la còla abans la sortida. Pels articles, los autors me mandan lo tèxt brut e ieu fau la mesa en pagina, cèrqui las illustracions, las fòtos. Enfin, gerissi l'alimentacion del siti internet, la mesa en linha de la version papièr melhorada per las interaccions numericas : videos, sons…
Retrobatz lo trabalh d’Elodia Saulnier aicí : lodiari.com
Version française sur metropole.toulouse.fr