"Causissi una globalizacion latina"
Lexic :
- Ara : maintenant
- Còsses : corps
- Clus : fermé
- Dralha : voie
- Pantais : rêve
- Pereu : aussi, également
- Puslèu : plutôt
- Soscadissa : réflexion
- Trencar : trancher
En concert le 25 octobre à Toulouse, Rodín prépare « Pereu » son nouveau disque de musique urbaine occitane.
Volètz far un disc per far dansar, es per aquò qu’avètz causit de musicas numericas ? Dempuèi un an e mièg que trabalhi sul disc, meni una soscadissa sus l’incarnacion. Vòli incarnar l’occitan dins los còsses en moviment. Donc, i a la volontat de far bolegar lo mond e per aquò seguissi 3 dralhas : lo hip-hop, la musica urbana americana latina (lo reggaeton, la cumbia, de musica argentina) e la musica de club amb de variantas de house. Soi ieu que faguèri totas las programacions, amb l’ajuda a còps de Danís Sampieri. A despart d’un pauc d’aubòi e de batariá, i pas d’instruments. L’ambient cambia solid en comparason amb lo primièr disc, « Pantais Clus », qu’èra mai calm e intimista.
Causir aquelas musicas, es la volontat de trencar amb lo demai de la produccion occitana ? Mon idèia, tre la debuta de mon trabalh, foguèt de dire qu’existissi ara e que vòli far part d’un panorama mai global. Es benlèu pas parièr per d’autres grops occitans, que pòdon aver una crenta de la globalizacion que se comprend. Ieu causissi de prene part a una globalizacion latina : son de musicas ispanicas que m’inspiran e soi dins un arc latin ont l’occitan a sa plaça amb lo castellan, lo catalan o lo romanés. Me sentissi mai a ma plaça aquí puslèu que d’ensajar de me far una plaça en França. De tota mena, fau de causas en occitan, sabi que serai totjorn un « outsider ».
Avètz fòrça convidadas, au femenin, sul disc, es una volontat ? S’es fach coma aquò, es una sensibilitat meuna, m’entendi ben amb d’artistas femeninas. Pel disc registrèri las cantairas de la nòva cançon occitana Miquèla Bramerie e Nicòla Alziary. Aviái ja recuperat de tròces de cansons d’elas, me diguèri qu’es colhon d’utilizar sonque çò d’abans. Mas, s’i a de convidats, i a pas gaire de duos sul disc, son mai que tot de poetessas occitanas e catalanas : Aurelià Lassaca, Iris Kaufmann (ma sòrre), Azucena Momo, Joana Gomila, Laia Vallès. En septembre sortirem una primièra cançon, puèi serà una per mes fins a la sortida del disc un an aprèp. E vos ai pas tot dich, qu’i a tanben un convidat suspresa…
Plus d’infos https://neblum.art/
Pour accéder à la version française, flashez ce QR Code
