" Ongan, constatam una montada de las inscripcions "
Lingüista vengut de Peiregòrd, Rafèu Sichel-Bazin ensenha a l'universitat dempuèi setembre.
Lexic :
A l'encòp : à la fois
Aprigondida : approfondie
Biais : moyen
Caire : côté
Cercaires : chercheurs
Cerquèri : je cherchai
Ensajam : nous essayons
Ongan : cette année
Quicòm : quelque chose
Trobèri : je trouvai
Cossí vos venguèt lo gost de la linguistica e sustot de la lenga occitana ? Ma maire èra lingüista, doncas i aviá de causas de legir a l'ostal. E quand arribèrem en Peiregòrd dempuèi París, sabiái qu'èra la tèrra d'òc. Doncas cerquèri la lenga occitana e la trobèri dins un grop folcloric. Aital, ai aprés a l'encòp la musica, la dança e la lenga ; èra un biais d'aver quicòm de far fòra de l'escòla, coma èri pas esportiu. Aquel mond novèl m'apassionèt, mas quand venguèri far d'estudis a Tolosa èra en biologia. M’inscriguèri en occitan mai tard, en parallèl de la biologia, aprèp aver parlat amb d'estudiants que fasián d'òc al Miralh. Es doncas pels estudis d'occitan que comencèri de far de lingüistica aprigondida.
Quins son vòstres domenis de recèrca ? Soi sus mai d'una causa. D'un costat trabalhi sus de collectatges de cançons tradicionalas occitanas (l'organizacion melodica e ritmica, la relacion entre la lenga e la musica). D'un autre costat participi a diferents projèctes que se lançan. I a lo patrimòni lingüistic, musical e coregrafic en Lemosin - es a dire la plaça de la lenga, de la musica e de la dança dins la societat. E soi dins un grop de trabalh amb fòrça cercaires qu'ensajan de comprene çò qu'es lo ritme. Pas sonque la lenga o la musica, mas tanben lo ritme psicomotor, lo ritme neuronal. Ai daissat la musica de caire coma practicant, mas ne fau un objècte d'estudi.
Cossí se pòrta lo cursus d'occitan a l'universitat Joan Jaurès ? Avèm creat una licéncia bidisciplinària amb la seccion de catalan, en mai de las licéncias d'occitan e de catalan qu'existisson totjorn. Aquela novèla licéncia bidisciplinària, ont las doas lengas son a egalitat, a de succès. Lo master, el, se sona ara Estudi e Valorizacion dels Patrimònis Occitan e Catalan. E, ongan, constatam una montada de las inscripcions.
Version française sur toulouse.fr