Viure al país

« La cultura en Occitan »

Lo Diari es un magazine cultural tot en òc d’un format novèl. Son cap-redactor, Danís Chapduèlh, nos explica l'ambicion del títol.

LEXIC :

  • Assegurar : assurer
  • Cantaire : chanteur
  • Causas : choses
  • (A) còps : parfois
  • Daissat : laissé
  • Degun : personne
  • Fargar : forger, fabriquer
  • Mantunas : plusieurs
  • Pesquièr : vivier
  • Pilars : piliers
  • Prima : printemps
  • Títol : titre
  • Vam : élan, dynamique

Lo Diari a mai de dètz ans mas cambièt de forma radicalament en 2017. Perqué ?
Es la conjoncion de mantunas causas. I aguèt l'ambicion de fargar un sit Internet bèl, un vertadièr magazine en linha. E puèi l'arribada d'una grafista de formacion permetèt de balhar al Diari la « gula » qu'auriá una revista culturala en francés. Lo vam apareguèt atal. Es lo moment que se decidiguèt d’aver un dorsièr central, tematic e transcultural. Aquela version papièr pareis cada dos meses mas lo magazine en linha a un ritme de publicacion mai sostengut.

Lo Diari es en òc, mas se limita pas a la cultura occitana ?
Sa definicion es dins son eslogan : la cultura en occitan. Es a dire, la cultura occitana, solide, e tanben tota la cultura, mas en lenga d’òc. Parlam de literatura, musica, jòcs-vidèo, cosina, de cinèma… Soi a cercar qualqu’un capable de parlar de serias televisadas. La cultura occitana es majoritària perqu’avèm obligacion de tractar de sa produccion, que degun o farà pas a la nòstra plaça. E volèm mostrar la cultura d’òc actuala. Mas i a pas de rason de se limitar, totas las tematicas nos van tant que son dins lo domeni cultural. Nòstra sola restriccion es de trobar la persona per ne parlar.

Al Diari son d’actors culturals (escrivans, cantaires etc.) que parlan de cultura, es una volontat ?
Çò que compta es de reperar la professionalitat, que las personas pòscan explicar las dinamicas artisticas. L’avantatge dels actors culturals es que sovent comprenon lo sens de l’òbra prepausada, son contèxt. Avèm un pesquièr d’un quarantenat de personas qu’escrivon a còps una cronica o un article. E puèi i a dos pilars, Silvan Chabaud e Carolina Dufau, que nos permeton d’assegurar la qualitat de çò prepausat. A mai fasèm plaça a de joves cronicaires, gràcias a un partenariat amb l’Universitat Joan Jaurés. Avèm daissat la man als estudiants per un numèro especial previst a la prima.

https://lodiari.com/
Version française sur toulouse.fr