« Cadun a la libertat d’interpretar »

Pèir Lavit es un grafista basat a Tolosa e qu’expausa regularament dins la vila.

Avètz aprés lo trabalh de grafista en autodidacte, mas perqué avètz començat ? Es quicòm que m’a tostemps interessat, quand èri pichon ja dessenhavi fòrça. Mas pel grafisme es ligat a la musica : m’agrada lo rock al sens larg (mas sustot lo metal e lo punk), e dins la musica l’univèrs visual es fòrça important. Mai jove, aguèri un grop, amai organisavi de concèrts a Pau amb una associacion que se transformèt en label de punk, « l’Espiceria ». Faguèri de visuals per d’eveniments, d’autres grops los vegèron e me demandèron de trabalhar per elis, de far de « merchandising », de pochetas de disques. Me fasiá fòrça plaser e coma agradava a d’autras personas, aguèri de mai en mai de demandas. E prenguèt la plaça que la musica daissèt quand lo grop s’arrestèt. Mas al cap d’un moment passèri tanben un diplòm d’universitat en tecnicas multimèdias, ont aprenguèri un pauc mai de causas, per exemple pels sites internet.

Avètz d’artistas que vos inspiran ? M’agradan de causas plan diferentas. Dins l’epòca conteporanèa de mond coma Jean-Luc Navette a Lion, o Max Ernst per sos pegatges e sas gravaduras. E lo trabalh d’illustracion de Joan-Claudi Pertuzé. Abans el, aviái pas vist de becut (un ciclòp pireneenc, ndlr) dessenhat.

Alara de qu’es la plaça de la cultura occitana dins vòstre trabalh ? Fa qualques annadas faguèri una exposicion suls contes e legendas de Gasconha. Las culturas mitologicas son sovent presentas al cinema o en libres, mas lo mond coneisson pas gaire los mites d’aicí. Per aquò m’èri fòrça apuejat sus l’òbra de Bladèr. Ai collaborat tanben amb de grops de musica occitans, coma los avaironeses d’Enlòc. E puèi a 99% mos trabalhs personals an un títol en òc : me ten a còr e considèri que la lenga val pas mens qu’una autra. L’imatge es un domèni ont soi mai a mon aise per m’exprimir qu’amb los mots ; e quand dessenhi quicòm, cadun a la libertat de far son interpretacion, m’agrada aquela libertat. Pasmens, quand i a de tèxtes, son en occitan en general.

Descobrir lo trabalh de Pèir Lavit : peirlavit.com
Version française sur toulouse.fr

Lexic :

  • Agradava : plaisait
  • Becut : personnage mythologique des Pyrénées
  • Cadun : chacun
  • Còr : coeur
  • Fòrça : beaucoup
  • Gravaduras : gravures
  • Lion : Lyon
  • Pasmens : toutefois
  • Pegatge : collage
  • Quicòm : quelque chose
  • Títol : titre
  • Tostemps : toujours, tout le temps