L'occitan conven perfièchament al ròck

Paulin Courtial es en concèrt lo 25 de junh a Tolosa, amb son grop CXK, per festejar la Sant Joan.

Lexic
Basta : suffit
Causida : choix
Netejar : nettoyer
Mandam : on envoie
Poderós : puissant
Raiças : racines
Rompeduras : ruptures
Rufe : rude

Amb CXK avètz fach la causida d'un ròck rufe, que peta, perqué aquela estil ? Es una causida de fonccionament mai que d'estetica. Sèm « on » o « off » : se jogam mandam tot. Amb Dimitri Kogane, lo bateire, èrem dins una formacion abans amassa e quand avèm montat lo duo CXK, voliam netejar la musica que fasiam. Voliam far una terapia amassa. Avèm una envèja d'eficacitat, d'anar a l'òs. Doncas cap a quicòm de brut, de rufe. Lo ròck fa part de las musicas mai potentas, que fonccionan en directe. Se pòt pas escotar d'aise dins son salon. Cèrqui d'ensajar lo mai possible d'experiéncias en concèrt, de far la musica mai organica possibla. Ai una formacion de guitarra classica al conservatòri e en musicologia, mas jogavi ja amb aquela energia, una energia vitala.

I aguèt una evolucion dempuèi la creacion de CXK en 2017 ? Nos sèm inspirats de las musicas tradicionalas occitanas, dels tèxtes sustot per ieu. Mas per dire çò que vòli dire, lo trad me basta pas pus, doncas escrivi. Trabalham pas mai amb lo collectatge, pasmens tornam totjorn a las raiças de las dansas tradicionalas. Perque se retròba dedins una transa coma dins lo ròck. Per ieu aquò's completament parier.

Lo ròck es pas la musica pus adoptada en lenga nòstra, quinas son vòstras influéncias ? Mai avanci, mai tròbi que l'occitan conven perfièchament al ròck. E compreni pas que i aja pas mai de trabalh que siá fach. Dins la vocalizacion de la lenga, es pròche de l'anglés coma es utilizat dins lo ròck. En occitan, per rapòrt al francés, i a mens de rompeduras : se pòdon tirar de fials, i a mai d'accents tonics, mai de fluiditat. Ieu, soi nascut dins l'occitan, mas dins la lenga puslèu que dins la musica. Aprèp l'evidéncia dins las nòstras referéncias es lo grop Queens of the stone age. Son famoses mas son pas venguts una marca, son totjorn en creacion.

Concert de CXK per la Sant Joan 2022 lo 25 de junh 2022 al Jardin des Plantes
Version française sur toulouse.fr