« Promòure la cultura sul nòstre campus »

A l'Universitat Joan-Jaurès, los estudiants occitanistas an una associacion, « Òsca ». Encontre amb Quentin Teillet.

En 2020, lo confinhament anullèt vòstra Setmana occitana, de qu'avètz fach per la remplaçar ? Ongan la Setmana occitana deviá èsser consacrada a Joan Bodon, pel centenari de sa naissença. Aviam tot previst : concèrts, conferéncias, cantèra… Avèm ensajat de la reportar a la davalada mas tot es complicat. Çaquelà, a las datas qu'èran previstas, avèm publicat cada jorn suls malhums socials quicòm en ligam amb la programacion. Una presentacion de libre, de la vida de Bodon, de cançons… La Setmana occitana es lo gròs projecte cada an per « Òsca », que nos permet de promòure la cultura occitana en vila a Tolosa, e mai que mai sul campus. Cada edicion, aculhissèm tanben d'estudiants de Lleida en escambi.

« Òsca » es un element important dels estudis d'occitan ? Sèm un trentenat de membres, quasi totis inscrits en occitan a Joan Jaurès. Cada annada n'i a tanben dos o tres que son pas en cors amb nautres. En licéncia d'occitan, coma sèm pas nombroses, l'integracion dins la promocion es aisida. E puèi l'associacion nos permet d’encontrar los estudiants de las autras classas. Doncas nos coneissèm totis e me pensi qu'avèm mens de pression que dins las autras matèrias. Sabèm que i a mond per nos ajudar. Los professors tanben nos coneisson, per eles sèm pas un estudiant de mai, sens nom.

Venètz de Peiregòrd, cossí sètz arribat dins l'associacion ? Fau d'occitan dempuèi ma dintrada al collègi e sabi dempuèi la 3ena que vòli passar la licéncia. Soi vengut a Tolosa per aquò. E tre la primièra setmana, los ancians de l'associacion venguèron en classa per la nos presentar. Ieu èri motivat : « Òsca » nos permet de participar en espectator e coma organizator a d'eveniments culturals. Çò qu'es agradiu es que dins aqueles eveniments i encontram tanben mond de'n defòra de l'universitat, de regents, de militants, d'associatius… Sabi pas s'aquela proximitat existís dins totis los mitans coma dins l'occitanisme.

LEXIC :

  • Ajudar : aider
  • Amb : avec
  • Çaquelà : cependant
  • Confinhament : confinement
  • Davalada : automne
  • Defòra : dehors
  • Dintrada : rentrée
  • Ligam : lien
  • Malhums :réseaux
  • Ongan : cette année
  • Òsca : bravo
  • Promòure :promouvoir
  • Sabi : je sais (saber = savoir)
  • Trentenat : trentaine

Version française sur toulouse.fr