Nòstres espectacles son ligats a la diversitat culturala
Christophe Rulhes e sa compania prepausan un teatre qu’intègra las scienças socialas e la lenga d’òc.
Lexic :
Afortissián : assuraient
Cercas : recherches
Daissar : laisser
Inibit : inhibé
Mesclar : mélanger
Pèça : pièce
Cossí ne sètz vengut a mesclar l’antropologia, la sociologia amb la musica, lo teatre o lo circ ?
Son mas passions. Soi eissut d’una familha paisana de Roergue, bilingüa. La problematica de la transmission foguèt imediatament presenta dins ma vida, fòrça jove ja, collectèri mon grand. Era una cultura viva, i aviá una transmission de la musica, dels contes. Se cantava a cada repais, per las vendémias, jogavi de cabreta. Tot aquò me balhèt un cèrt rapòrt a la lenga e a l’ecologia. Consacrèri ma mestrèsa de sociologia a l’ensenhament de l’occitan, puèi trabalhèri amb de mond coma Daniel Fabre o Dominique Blanc que practicavan una antropologia indigèna. Son d’occitanofòns qu’afortissián qu’abans de poder anar estudiar l’Amazonia, cal començar per conéisser son paire e son grand. Pasmens, soi encara inibit per la lenga occitana, perqu’es per ieu una lenga de diglossia, mos parents me butèron a l’aprene pas.
De que trobam dins vòstres espectacles de la cultura occitana ?
Totes nòstres espectacles son ligats a la diversitat culturala, amb al mens 2 o 3 lengas. Placi totjorn qualquas frasas en occitan o mai – per la pèça Singularité Ordinaire, un tèrç del tèxte èra en òc. Dins l’espectacle que ven i aurà de grico del sud d’Itàlia, de salentino, de derja (lo tunisian dialectal), d’occitan e de francés. Sovent utilizam la video per daissar parlar lo mond qu’avèm rescontrat pendent las enquistas de terren. Avèm una seria consacrada a las zònas que son iper ricas en lengas : lo primièr se sonava Lenga, puèi creerèm Selve que parla de l’Amazonia e del pòble Wayana.
Contunhatz de menar un trabalh universitari o vòstras cercas son fachas sonque pel teatre ?
Las cercas son fachas sonque per las pèças que montam amb mon complici Julien Cassier. Pasmens, fasèm d’escambis amb de cercaires e d’intelectuals coma Bruno Latour ; faguèri tanben una publicacion en Australia a prepaus de nòstre espectacle Selve. E soi totjorn ligat al laboratòri d’Antropologia Sociala de l’Escòla de Nauts Estudis en Scienças Socialas (EHESS), per validar lo trabalh de nòstra compania, lo GdRA.
Version française sur toulouse.fr