Ensenhan l'occitan a Tolosa e dins lo mond entièr
Julie Loubère trabalha al Collègia d'Occitania, l'estructura mai anciana de Tolosa per vos aprene la lenga occitana.
Lexic :
- Cap a : vers
- Esparpalhats : éparpillés
- Un fum : une nuée, beaucoup
- Léser : loisir
- Malhum : réseau
- Mandats : envoyés
- Quora : quand
- Talhièrs : ateliers
- Tòca : but, objectif
- Se trapan : se trouvent
Dempuèi quora existís lo Collègi d'Occitania ?
L'associacion foguèt creada en 1927 e tre la debuta la tòca èra de prepausar de formacions a distància : èran de corses d'occitan qu'èran mandats per corrièr e los escolans tornavan los exercicis per via postala tanben. Uèi, avèm una platafòrma pedagogica d'ensenhament a distància. Coma fa temps que l'estructura existís, i passèron d'estudiants famoses coma l'escrivana Loisà Paulin o l'autor Joan Bodon.
Se pòt seguir de corses en classa tant coma a distància ?
Solid. Sèm qualques uns a Tolosa que fasèm la part en presencial. Mas avèm un malhum de professors esparpalhats dins l'espandi tot d'Occitania : en Provença, Gasconha, Lemosin, Lengadoc e quitament avèm un professor que viu a New-York. Los estudiants a distància eles se trapan au Japon, Estats-Units, Africa del Sud, Corea... Son mai que mai d'universitaris romanistas o medievistas, o alara d'expatriats que l'aluènhament amb lo país e la familha motiva per fargar un ligam novèl.
Quin es lo public pels corses en presencial ?
Aqueles corses se fan en grops. Siá son mond qu'o fan pel léser (coma de parents de Calandreta, mond que cantan en òc, d'unes qu'an la lenga dins la familha o la curiositat de descobrir) ; siá son mond que cèrcan de formacions professionalizantas : animators o ATSEM que trabalhan en Calandreta o en centre de léser, d'ensenhaires de l'Educacion Nacionala que vòlon aver la formacion en occitan per se dirigir cap a las classas bilingüas. Avèm tanben de personas en cèrca d'emplec que desiran una competéncia en mai.
Quand de formacions menats, personalament ?
Un fum ! Las formacions dels animators, nivèl debutant e nivèl confirmit ; dos grops de parents e de mond curioses ; la formacion pels ensenhaires e puòi una autra classa qu'a per tòca de transmetre la cultura generala occitana (poesia, istòria, musica, literatura etc.). Mas soi tanben encargada de far de reviradas per la vila de Tolosa o de menar de visitas guidadas. Ara volèm desvolopar de talhièrs pels enfants, emai los mai pichons.
Pour accéder à la version française, flashez ce QR Code