Convergéncia per difusir la convivéncia

Joan-Francés Laffont e Convergéncia Occitana dirigisson l'Ostal d'Occitania, lo còr de la cultura d'òc a Tolosa.

Animacion culturala, ròtle politic: de qu'es es la tòca de Convergéncia occitana ?

Convergéncia es una federacion d'associacions, a l'ora d'ara n'i a 80. S'i trapa l'Institut d'Estudis Occitans, Calandreta, mas tanben una associacion basca, una bretona e venèm d'aculhir Ucraïna Occitania, una associacion de femnas ucraïnianas. La tòca primièra de Convergéncia foguèt d'obténer un ostal per la cultura occitana. Pendent la campanha de las municipalas de 2001, Phlippe Douste-Blazy s'engagèt a crompar un ancian bastiment dels espitals tolosans, l'ostal de Boysson-Cheverry, qu'es un monument istoric, per installar aquí l'Ostal d'Occitania. Foguèt fach e aprèp las òbras de restauracion, s'inaugurèt l'Ostal en 2006. E contunham per cada eleccion, legislativa, departamentala, comunala, d'agir coma un “lobby”. Avèm una platafòrma de revendicacions e recampam totes los candidats que s'exprimisson sus aquelas demandas. Atal i a una votz unica per l'occitan, qu'es mai fòrta que las votzes de cada associacion soletas.

Convergéncia es responsabla de la gestion de l'Ostal d'Occitania ?

Òc e avèm un quasèrn de cargas per far viure l'Ostal, que se tròba carrièra malcosinat. Dins l'Ostal, avèm de salas d'exposicion, d'acamp, d'ensenhament tanben amb los corses d'occitan. Dins las doas corts se debanan de manifestacions. E puèi, en mai de las associacions qu'i trabalhan dins los burèus, i a los locals de doas ràdios, un pichòt restaurant emai una librària occitana, la Tuta d'Òc, gerida per l'IEO 31. Nos manca benlèu sonqu'una sala d'espectacle. Pasmens, cada dijòus, un eveniment es organizat : la presentacion d'un disc, d'un libre, una conferéncia… e totjorn a gratís !

En defòra de l'Ostal d'Occitania, Convergéncia agís tanben ?

Cada an, fasèm mantun temps fòrts. Son d'eveniments que ponctuan l'an : la commemoracion de la carta de las libertats comunalas, libertats obtengudas en 1189 pels Tolosans ; lo recampament en remembre dau lenhièr de Montsegur cada 16 de mars ; e puèi la fèsta de la Sant Joan. Es una fèsta amb de concèrts, mas sustot per far trabalhar lo mond sus la convivéncia. Perque l'occitan, en mai de sa lenga, pòrta de valors que volèm mostrar e partajar. La convivéncia es l'art de viure amassa, dins lo respècte mutual de l'alteritat. A la Sant Joan, d'enfants de las calandretas e de las escòlas de barris dificils montan amassa sus l'empont. Gràcias a Alem Surre-Garcia, i aguèt tanben de migrants, Sodanesés o Afgans, que faguèron una sceneta tot en occitan. Aquò's tanben nòstra tòca : lo paratge e la convivéncia.

Lexic :

  • Acamp : réunion
  • Amassa : ensemble
  • Barris : quartiers
  • Benlèu : peut-être
  • Espitals : hôpitaux
  • Paratge : vertu médiévale, principe d'égalité entre les sexes et les classes sociales
  • Recampam : nous réunissons
  • Remembre : souvenir
  • Tòca : objectif, but
  • Votz : voix

Pour accéder à la version française, flashez ce QR Code ou rendez-vous sur ce lien.