« Cantar es un besonh uman »
Mathilde Lalle prepausa dins son quartièr de las Pradetas un fum d’activitats en musica e en òc.
Lexic :
Boha : type de cornemuse
Corric : mail
Demesida : diminution
Dissabte : samedi
Encastre : contexte, cadre
Estatjants : habitants
Pivelada : captivée
Querre : chercher
Trabalhatz de cants polifonics dels Pirenèus e d’endacòm mai, fins ont anatz ne querre ?
Las Pradetas es un quartièr cosmopolita, doncas i a aicí de tradicions de cant diferentas, vengudas de diferentas culturas. Amb l’associacion « Les Belles Fanes » avèm montat una residéncia de territòri pendent 2 ans : sèm d’artistas regularament presents dins lo quartièr per far de musica amb los estatjants. E atal, collectam un repertòri del quartièr. Dedins, i a de cançons en òc, balhadas per d’ancians o pel collègi calandreta, mas tanben en malgach, laossian, georgian, bambara, comorian… Cada setmana avèm lo talhièr de cant, mas tanben las seradas « Cantadas » qu’organizam lo segond dijòus de cada mes al cafè cultural Les Folles Saisons.
Cossí ne sètz venguda a cantar, vos ?
Èri estudianta a Tolosa e per azard ai descobèrt la musica occitana dins un concèrt. Eri pivelada per la boha e anèri al conservatòri per aprene a ne jogar. Puèi foguèron las dansas, lo cant polifonic. Acabèri per passar lo Diplòma d’Estudis Musicals e dins aquel encastre faguèri un trabalh de recèrca que portava sus « la practica e foncion del cant a Tolosa de l’Edat-Mejana fins a uèi ». Per ieu, cantar es un besonh dels umans, coma manjar o beure. E mai se la practica recuolèt amb la demesida de la practica religiosa tanben, la lenga mens parlada… Mas de mond son tanben venguts amb d’autres cants.
Sètz ara membre de mantunas formacions ?
Òc, jògui amb lo grop Platane, lo trio Mar Nòstre o lo duo Perdigòla. Sustot, anam lançar a las Pradetas una orquestra populara del quartièr : una orquestra que jogarà la musica dels estatjants, de cançons transmesas pel mond dins quina lenga que siá. La tòca es de far un concèrt per la fèsta de la musica e començam las repeticions en genièr. Serà cada primièr e tresen dissabte de matin, cada mes, al centre d’animacion de Bòrda Blanca.
Per nos contactar, avèm un corric lesbellesfanes@gmail.com
Version française sur toulouse.fr