« Los enfants trabalhan la fisança en eles »
Aurelia Alberge, regenta, pòrta una activitat originala a l'escòla Falguièra de Tolosa : de ràdio en òc.
Lexic :
Aprestada : apprêtée
Ausir : entendre
Espaurugats : effrayés
Fisança : confiance
Gaireben : presque
Mairala : maternelle
Mena : sorte
Nadal : noël
Palancas : passerelles
Present : cadeau
Sap : sapin
Cossí se registran aquelas emissions de radio ?
L'emission se fa amb d'enfants de mairala, una classa ont an 3-4 ans e una de mai grands qu'an entre 5 e 6 ans. L'animator de Conta Monde, Giraud Delbès, ven a l'escòla amb un tecnician e pausa de questions als escolans. Mas es pas d'improvisacion, avèm aprestat l'emission abans.Totes los enfants parlan pendent l'emission : los pus pichons saludan, « adieu », « adieussiatz », comptan e respondon a l'apel ; los mai grands son gaireben a far de frasas, coneisson las colors, las chifras o de vocabulari sus un tèma. En decembre avèm fach una emission sus Nadal, doncas foguèt question de « present », de « sap » o de « fèsta » e avèm cantat de cançons de Nadal. Es una restitucion del trabalh fach.
D'enfants tant joves son pas espaurugats ?
Son contents de participar e de se far ausir. Lor disi que mercés al micrò pòdon èsser ausits pertot dins lo mond. Es una motivacion qu'ajuda a plan trabalhar abans la venguda de l'emission e vesèm la diferéncia. La tòca es l'aprentissatge, totjorn. Los enfants trabalhan la fisança en eles, lor cal parlar fòrt, pron fòrt per èsser ausits. Aquò's fòrça important. E la tòca de l'exercici es tanben l'articulacion.
Fasètz d'autras activitats d'aquela mena ?
Sèm pas dins una classa bilingüa, mas l'occitan es lo projecte de classa que meni sus l'annada. Alara fasèm d'espòrt en òc, d'espectacles, de dansas. Un còp sèm sortits per comprene lo nom en occitan de las carrièras de Tolosa.
Perqué avètz causit l'occitan coma projècte de classa ?
Mos enfants an seguit un cursus bilingüe a l'escòla Matabiau e aquò me balhèt l'idèia d'aprene la lenga. Un conselhièr pedagogic me prepausèt puèi de l'emplegar dins mon mestièr : fau aprofechar los escolans de ma competéncia. Quand èri estudianta, pratiquèri lo latin e amb l'occitan aguèri l'impression de ne tornar far. M'agradan las palancas entre las lengas romanicas.
Podètz escotar Aurelia Alberge e sa classa sur France Bleu dins l’emission Conta Monde del 11 de decembre 2022 sus lo site francebleu.fr
Version française sur metropole.toulouse.fr