La cultura occitana es ja creolizada
En octòbre, « L'Occitan fa punk » animèt l'universitat Joan Jaurès. Léo Devillers n'èra l'iniciator.
Lexic :
Ancorada : ancrée
Carrièras : rues
Cèrca : recherche
Charrant : discutant
Cossí : comment
Eissut : issu
Maina : s'occupe
Pas brica : pas du tout
Tòca : but
Sètz pas brica eissut del mitan occitanista, cossí avètz agut l'idèia d'aquel festenal ?
Soi arribat a Tolosa fa dos ans e çò que primièr me restaquèt a la cultura d'òc es lo metrò e los noms de las carrièras. Aprèp rescontrèri de personalitats de la cultura occitana e m'avisèri qu'aicí es una cultura tras qu'ancorada, territorializada, sustot en comparason amb Bordèu d'ont arribavi. Abans d'èsser programator cultural, faguèri un trabalh de cèrca sus l'etiqueta « musicas del mond », qu'es un etiqueta tanben post-coloniala, puèi que son los occidentals que rendon visiblas o non aquelas musicas. E aviái l'idèia de mostrar que l'occitan tanben pòt èsser dins las musicas dichas del mond : coma conta una istòria, una cultura, una lenga, es tant « exotisant ». Es pas pena d'anar luènh.
Lo festenal durèt doas setmanas : voliatz mostrar la creacion en òc d'un biais larg ?
La programacion s'es facha en charrant amb de mond coma Rafeu Sichel Bazin qu'ensenha a l'universitat, Pascal Caumont del conservatòri o lo cantaire Dje Balèti que me faguèron de proposicions. Al final, i aguèt de musica, de conferéncias, de balètis, de projeccions, de teatre, de circ e de dansa. Descobriguèri que la cultura occitana es fòrça rica e fòrça creolizada ja, doberta sul mond. En mesclant los folclòrs se podriá dire que se bastisson de neo-folclòrs e aquò's infinit.
Aquela primièra anóncia una seguida ?
Ongan, l'organizator èra lo Centre d'Iniciativa Artistic del Miralh, que se maina de la programacion culturala sul campus. Mas la tòca es de daissar l'afar ara a l'associacion dels estudiants occitans, Òsca. Son ja eles que faguèron la serada « balètis dels tripons ». Avèm poscut lor transmetre un pauc la gramatica dels eveniments culturals, per ben organizar. Aquò permetèt ja de balhar de visibilitat a l'ensenhament de l'occitan sul campus. Avèm agut de bèlas manifestacions: un carnaval salvatge amb la Vespa Cogordon, una conferéncia sus la pop-cultura e l'occitan o una carta blanca amb lo realizator Amic Bedel.
Version française sur toulouse.fr