Escambis en musica, De l'escòla a l'empont
Lexic :
A l'encòp : à la fois
Barris : quartiers
Bateire : batteur
Capitatz : vous réussissez
(capitar : réussir)
Clavi : je referme
(clavar : fermer)
Genièr : janvier
Mainatges : enfants
Musiquejar : faire de la musique
Pivelats : captivés
(pivelar : captiver)
Tròces : morceaux
Virar : tourner
Cantaira e musiciana dins lo duò de cants a dançar Cocanha, Carolina Dufau fa descobrir l'occitan dins los Claé.
Çò que prepausatz es una descobèrta artistica de la lenga ? Sèm 3 intervenentas, i a de danças, de cantas qu'acompanhan la descobèrta del vocabulari, d'expressions. Ieu, clavi lo percors, que dura de genièr fins a mai, amb una animacion de contes. Intègri tostemps dins las istòrias de cants, de percussions, e d'elements que los enfants an aprés dins las autras intervencions. Son pas tròp nombroses, 10 a 15, e aquò nos balha un contèxt de qualitat, son pivelats. Çò mai interessant, es que tot aquò se fa dins d'escòlas sens cursus d'occitan mas, sovent, dins de barris ont exitís ja de multiculturalisme, de bilingüisme. Escambiam de vocabulari entre nòstras lengas e puèi nos fa trabalhar amb de mainatges qu'avèm pas d'autra escasença d'encontrar.
A costat, capitatz de jogar amb Cocanha, malgrat la crisi sanitària ? Dempuèi un an ara, sèm passadas dins un format en duò amb Lilà Fraysse – totas doas coma cantaira e musiciana a l'encòp. E d'èsser una pichòta estructura nos permet de nos adaptar aisidament, emai en acostic. Alara, avèm poscut musiquejar tre que los concèrts an représ. Mas per aquela novèla formula en duò, calguèt reprene nòstres tròces, los adaptar. N'avèm abandonat d'unes, creat de novels. Contunham de far virar nòstre segond disc, « Puput » : èra sortit la velha del primièr confinhament, l'avèm pas poscut defendre coma cal encara.
Avètz tanben desvolopat de novèlas collaboracions ? Avèm fach una creacion amb lo grop Sec, un bateire e bassista, serà un duel de duòs. E puèi anam montar una novèla creacion, del costat de Catalonha, amb dos autres duòs - dempuèi que sèm dins aquela formula, n'encontram tostemps. Trabalham sus la memòria d'obrièras del textil que foguèron collectadas e aquò se deu sonar « Al fial de la memòria ». Es amb La Tarta Relena e amb Los Sara Fontan, per un espectacle que serà presentat al festenal Grec de Barcelona en junh.
Version française toulouse.fr