« Me plaçar a la fin del mond amb l'occitan »
Le chanteur Louis Pezet présente son nouveau projet : Louis Z. Pour la première fois il est seul, et fait de la pop.
Perqué vos lançar en sòlo pel primièr còp ? Ai totjorn fach de musicas en sòlo, mas pas en concèrt. Cal dire qu'es mai aisit per aver de concèrts d'èsser en sòlo. Mas voliái tanben far d'autras causas que lo ròc que fasèm amb Feràmia : un pauc de pop, d'electro, de rap. Me permet d'anar mai luènh dabans lo public, d'exprimir quicòm de mai personal. Quand siás tot sol, pòdes tot cambiar quand vòles e, ieu, aimi de cambiar. Aviái començat fa dos ans en guitarra-votz sonque, e fa qualques meses cambièri tot, trabalhi amb de maquinas, de sintetizadors modulaires. Faguèri un clip tot dins minecraft, « Aimar », o podriái pas far amb mon grop. Ai envèja de me far plaser diferentament.
Que son las causas mai personalas que volètz exprimir ? La tematica que soi encara a trabalhar, soscar, es un pauc mon rapòrt amb l'occitan : ai aquela lenga, aquela cultura e tot aquò desaparèis. Sèm a la fin de quicòm. De que fasèm amb aquela situacion ? Que podèm far ? Son de questions d'identitat. Alara, l'idèia qu'ai es de me prene ièu amb l'occitan e de me plaçar a la fin del mond.
Volètz far de pop, cossí o definissètz aquel genre ? Diriái que son puslèu mas inspiracions que venon de musicas internacionalas popularas : Rosalia, Billie Eilish, Lana del Rey – vertat qu'escoti fòrça femnas. Aquelas musicas las partajam amb un fum de mond, es una basa comuna amb un fum de mond. Totes mos amics las escotan. Es una causa comuna doncas que pòdi aver amb lo public, en gardam mas especificitats. Emplègui un sintetizador de « geek » que me balha mai de possibilitats e i a tanben un costat un pauc experimental. Sus l'empont, solèt, es un pauc mai espaurugant. M'agrada mas cal encara trabalhar, es una debuta. Espèri que l'an que ven contunharai de publicar causas e lèu un EP.
Lexic :
- Empont : scène
- Espaurugant : effrayant
- Faguèri : j'ai fait
- Luènh : loin
- Meses : mois (au pluriel)
- Quicòm : quelque-chose
- Sintetizador : synthétiseur
- Soscar : réfléchir
- Un fum : beaucoup
Pour accéder à la version française, flashez ce QR Code